Америцькый презідент Доналд Трамп у четверь вызвав Україну, жебы ,,скоро“ досягла договор о закончіню російской інвазії. Ёго слова пришли перед очекованыма рокованями, котры бы мали подля медіалізованых справ через вікенд вести делеґації Вошінґтону і Москвы в Маямі на Флорідї. TASR о тім інформує з одкликанём ся на аґентуру AFP. ,,Но, приближують ся ку дачому, але надїям ся, же Україна буде дїяти скоро. Надїям ся, же Україна буде дїяти скоро, затоже Росія є там,“ повів Трамп новинарїм в Овалній працовнї. ,,А знате, все, кедь їм то довго тырвать, Росія змінить назор,” додав. О рокованях в Маямі  в середу інформовав маґазін Політіко з одкликанём ся на два жрідла. Частёв російской делеґації бы подля єдного зо жрідел мав быти і окремый высланець Кіріл Дмітрієв. Америцькый бік бы мали традічно заступовати Трамповы высланцї Стіві Віткоф і Йаред Куснер. Подля єдного жрідла Політіка ся з америцьков делеґаціёв іщі передтым може стрїтить україньскый выїднавач Рустем Умеров.

(TASR, Шутіова)