У віторок 14-го юла у вечорных годинах вмер єпарха Мукачівской ґрекокатолицькой єпархії владыка Мілан Шашік. Мав 67 років. Причінов смерти мав быти інфаркт. Монс. Мілан Шашік ся народив 17-го септембра 1952-го року, быв родаком із села Легота в окресі Нітра. Штудовав на Римокатолицькій кірілометодійскій богословскій факулті в Братіславі і рукоположеный быв у 1976-ім році. В році 1973 склав вічны обіты в Місійній Конґреґації отців лазарістів. Служыв у візантійскім і латиньскім обряді. В 1990-ых роках діяв на Апостольскій нунціатурі на Україні. Од року 2000 быв римокатольцкым парохом в Перечині, на Підкарпатю. У 2002-ім році быв выменованый Папом римскым Йоаном Павлом ІІ. за апостольского адміністратора Мукачівской ґрекокатолицькой єпархії. Рукоположеный на єпіскопа быв на Праздник Богоявленія 6-го януара 2003-го року в Базиліці св. Петра в Римі. В році 2010 быв менованым за мукачівского єпарху. За його періоду консолідовала ся єпархія, основали ся новы парохії, збудовало ся много храмів. Вічная память!

(Медвідь)