Коло 250 людей зышло ся в суботу 24-го мая 2025-го року в просторах Културного центра імени Йожефа Атілы в Будапешті, жебы взяти участь на Русиньскім націоналнім святі, котре шторік в місяці май орґанізує Вседержавне русиньске самосправованя в Мадярьску. Тота подія, котра є скапчана із передаваньом Премії імени Антонія Годинкы, каждый рік проходить в іншім місті. Головным покровительом Русиньского націоналного свята тот рік быв Мікловш Шолтес – державный секретарь Державного секретаріата Канцеларії премєра з вопросів реліґійных і націоналных капчань, котрый покровительство перевзяв вєдно із Віров Ґіріц – представительков Русинів у Парламенті Мадярьска. Тот рік лавреатом Премії імени Антонія Годинкы стала Жужа Токач, котра є окрім іншого підпредсидательков містного Русиньского націоналного самосправованя. Так само є ключовов персонов у представительскім орґані меншыны, котра нелем дає ідеї, але і веде проєкты, орґанізує вшелиякы проґрамы. Жужа Токач актівно брала участь на створіню і проєктованю русиньской хыжы – музея у Шайовпалфолі, а так само на автентічнім заряджіню того музея. Як педаґоґ орґанізує літні таборы, реґіоналны і націоналны познавательскы проґрамы про діти із села, а як представитель русиньской меншыны орґанізує реліґійны пути і події. Фото: Віктор Ґіріц. (ЛЕМ.ФМ, Пкф)