Польска владна правіцьова партія Право і Справедливость собі по вікендовых вольбах лишыла векшыну кресел в Сеймі – нижній коморі парламенту. З одкликаньом ся на понедільковы офіціалны резултаты о тім інформовали аґентуры Associated Press і AFP. ПіС підпорило до сейму 43,59 процента голосуючіх, што партії забезпечіло 235 кресел в Сеймі, і так має векшыну. На другім місці скінчіла Обчаньска коаліція, котра здобыла 27,4 процента і 134 мандатів. ПіС здобыла нецілых 45 процент голосів у выборах до 100-членного сенату, і так буде мати 49 сенаторів. Перед вольбами мала партія 61 кресел у вышній коморі парламенту. Опозічны партії бы мали мати в Сенаті 51 кресел. Іщі все не суть зрахованы голосы, котры пришли зо заграніча, но тоты подля очековань не змінять розділіня кресел.

(Медвідь, TASR)