В історічній пражскій будові із 18-го столітя, котра служыла лужыцькым Сербам як Сербска семінарія, а днесь має чеську назву Лужыцька семінарія, 20-го апріля 2024-го року одбуде ся Русиньскый день. Інформує о тім найновіше выданя офіціалной ґазеты Общества приятелів Підкарпатьской Руси – Podkarpatská Rus.З ініціатівов зорґанізовати Русиньскый день пришло Общество приятелів Лужыці, з котрым Общество приятелів Підкарпатьской Руси вже в минулости співпрацовало. Лужыцькосербска орґанізація окрім іншых своїх актівностей представлює і малы славяньскы народы, меджі якы рахують ся і лужыцькы Сербы, і котрых общество здружує. В проґрамі, котрый буде іщі публікованый на сайті Общества приятелів Підкарпатьской Руси, буде много інтересного. Мож буде окрім іншого выслухати рефераты реномованых історіків і културных діятелів із Чеськой републікы, Словакії і Підкарпатя. Так само приготовлює ся панелова діскусія, котра має быти на темы як історія Русинів і Підкарпатьской Руси, култура і література, русиньскый язык і його розвиток а кодіфікація, ці історія чехословацькой штатной справы за Першой републікы. (ЛЕМ.ФМ, Пкф)