В Петровци в Хорватії ся тот вікенд одбуде 15-ый річник културной події „Кед голубица лєцела“. Подiя, котра буде тырвати од 26-го до 28-го септембра, мать за ціль підпорити і презентовати културну дідовізню Русинів. Проґрам ся зачне в пятницю в Петровцях дітскым фолклором і меджінародным вечером русиньскых фільмів, де буде одпрезентованый і куртый документарный фільм „Русины в Переґу Маре“. Суботній проґрам належыть споминці  жертвам войны, а то кладжiньом вінців к памятнику у Винковцях і Старім Янковци. Окрім того одбуде ся і засіданя Світовой рады Світового конґресу Русинів і Світового форуму русиньской молодежі. Наслідно в Петровцях одбуде ся главна часть проґраму. По навщівi містьного храму і етноґрафічной збіркы кулмінує подiя културным проґрамом в Домі културы. Нашу вісемчленну делеґацію поведе Мартін Караш, председа Русиньской оброды на Словакії і член Світовой рады Русинів. (Пкф)