Америцькый презідент Доналд Трамп є по вчерайшых дебатах в Ріяді о много веце пересвідченый о тім, же ся подарить підписати договор о скінчіню войны на Україні. Высловив ся так вчера на пресконференції, котру зорґанізував у своїм флорідьскім центрі Mar-a-Lago, інформують о тім аґентуры AFP і станіця  Sky News. Вчерайшу америцько-російску стрічу в Ріяді керували америцькый міністер заграничных справ Марко Рубіо і його напротивок Серґей Лавров. Україньскы ани европскы представителі на стрічу небыли позваны. Рубіо і Лавров ся на їднанях договорили о вытворіню тімів на высокім рівні, котры будуть їднати о способі скінчіня войны, припоминать AFP.