Членьскы державы Европской унії в понедільок писемнов процедуров дефінітівно схвалили такзваный Фонд солідарности на 2026-ый рік, котрый є частьов Міґрачного і азілового пакту ЕУ. Выходить то із інформацій публікованых у віторок в Уряднім вістнику ЕУ. Новый механізм має помочі найвеце затяженым країнам з высокым чіслом приходів міґрантів. Словакія тоту ініцітатіву одшмарила і Европску комісію пожадала о выняток. Подля схваленой сістемы будуть мусити членьскы державы прияти встановлене чісло міґрантів, за кажгого неприятого міґранта заплатити 20 тісяч евр або дати оператівну і технічну підпору країнам, котры суть під найвекшым тиском. Кажда держава сама вырішыть, яку форму солідарности собі выбере. Комісія жадость Словакії о выняток з того пакту посуджує. Вырішыти бы мала до кінця року.

(Медвідь, TASR)