Сполочны російско-білоруськы воєньскы маневры під назвов Запад 2017, котры проходять коло граніць членьскых держав НАТО, можуть ся явити вонкашньому позоровательови як серьйозне рихтованя на велику войну. В албаньскім головнім місті Тірана то в суботу выголосовив председа воєньского комітету НАТО, чеськый армадный ґенерал Петр Павел. Аліанція за його словами далше має намагу обновити нормалну комунікацію міджі російсков армійов і арміями членьскых держав НАТО, жебы передыйти неумыселным дослідкам припадных інцідентів почас тых маневрів. На маневрах офіціално бере участь 5500 російскых і 7200 білоруськых вояків і закінчать ся 20-го септембра.
(Петро Медвідь)