Меджінародный фонд „Русская премия“ шторік в предвечур праздника св. Николая Чудотворця за старым календарьом оцінює авторів літературных і публіцістічных творів, котры были за остатні рокы написаны по русиньскы або російскы, творителів жыючіх на „віртуалній Підкарпатьскій Руси“. Іншак тому не было ани того року і 18-го децембра быв выголошеный тогорічный лавреат, котрым став русиньскый писатель, поет Михайло Град. „Русская премия“ му была уділена за великый вклад до розвитку русиньской літературы. Єдночасно Град став і переможцьом інтернетового голосованя. Михайло Град є русиньскый поет і публіціста, председа презідії Союзу русиньскых писателів Закарпатя. В Тячові основав районне Общество Подкарпатських русинов, дві русиньскы недільні школы і районну молодежну орґанізацію імени Александра Духновіча. Написав і выдав десять книжок на російскім, україньскім і русиньскім языку, в котрых є історія, поезія і співанкы Русинів. (Лем.фм)