Польща хоче од року 2027 понукати каждорічно воєньске тренованя 100.000 цивілістам, повів у вівторок премєр Доналд Туск і подрібніше представив авізованый розсяглый план на рошырїня армадных резерв. Інформує о тім аґентура AFP. Туск уж в пятницю оголосив програм розсяглого добровольного воєньского тренованя. Цілём є забезпечіти, абы каждый дорослый муж у Польщі быв вытренованый „про припад войны“ і країна мала воєньскы резервы способны противостояти „потенціальным загрожіням“. Польскый премєр хоче досягнути, абы ся од року 2026 к такому тренованю достав каждый інтересуючій. „В 2027-ім році будеме способны треновати 100.000 добровольників рочні,“ повів новинарям. Додав, же воєньскы тренованя мають быти доступны в як найвекшій мірі. „Каждый, котрый мать інтерес і є у віці од 18 до 60 років, достане подробны інформації о тім, як абсолвовати основне воєньске тренованя,“ повів Туск. (TASR, Pkf)