Великобрітанія і Чеська републіка вєдно підписали меморандум о порозуміню в области ядровой енерґетікы, інформовав у віторок уряд тамтешнього премєра Кеіра Стармера. Потвердив то і председа чеськой влады Петр Фіала, котрый із Стармером в понедільок їднав у Лондоні. Фіала означів односины меджі Чеськов републіков і Великобрітанійов за вынятковы. Як інформовав Фіала, меморандум поможе тіснішій співпраці в ядровій енерґетіці, што поможе забезпечіти енерґетічну безпеку і ціново доступны енерґії про будучі ґенерації. Інтензівно будуть теперь тоты дві країны співпрацовати на выробі малых модуларных реакторів. За словами Стармера тот меморандум має Великобрітанії принести чістішу енерґію, ліпші робочі місця і векшу безпеку.

(Медвідь, TASR)