Европска унія роздумує о дакілько можливых інштруменрах на звладнутя ролі Мадярьска в рамках блоку в припаді, же у вольбах в апрілю знова выграть премєр Віктор Орбан. Пише о тім маґазін Politico. Подля маґазіну Унія все веце їднать о тім, як бы тот блок міг фунґовати далше, покля бы Орбан здобыв далшый функчный період. Брусел подля неменованых діпломатів глядать рішіня нелем про мадярьского премєра, але про „непіддайных“ лідерів членьскых держав обще. Унія зато рихтує пять можливых сценарів про припад, же бы дакотра членьска держава цілый час блоковала вырішованя ЕУ. Тоты сценарі суть трансформація волебной сістемы – такзвана вецескоростна Европа, міцнішый фінанчный тиск, позаставліня права голосовати, а наконець і вылучіня з Унії, што є найтвердшов, але менше реалістічнов можливостьов. Тоты можливы сценарі вказують, же Унія штораз веце інтересує ся тым, як рішыти внутрішні конфлікты, головно вдяка хоснованю права вета з боку Орбана, але і словацького премєра Роберта Фіца.

(Медвідь, TASR)