На гранічнім переході Ужгород – Вышне Німецьке минулу середу славностно отворили пішый корідор, котрый уможнить жытелям переходити граніцю з Українов пішо або на біціґлю. Од зачатя пробной превадзкы 3-го януара го выужыло скоро 4000 людей. Як увела штатна секретарька міністерства фінанцій Даніела Клучкова, корідор про пішых і ціклістів є вкладом про обідві країны. Можность пішого переходу є выслідком сполочной ініціатівы, котра вышла зо сполочного засіданя влад Словакії і Україны. На україньскім боці были реалізованы технічны управы як приходы, семафоры і рампы про безпечне рушаня людей і ціклістів. „Фінанчна справа приправлює проєкт публічного обстараваня на реконштрукцію нашых просторів – будов, приступовых драг, тоалет і далшой інфраштруктуры. Іде о проєкт фінанцованый з джерел CEF в сумі скоро 8,5 міліона евр,“ увела Клучкова. (TASR, Пкф)