Поплаткы за уложіня ставебных і демолачных одпадів на складкы будуть звышены. Пропозіцію зміны приналежного наряджіня влады з ділні Міністерства жывотного оточіня СР днесь одобрила влада. Поплаткы за уложіня выкопаной землі і каміня на складку ся в будучім року мають звышыти з осьмых на десять евр за тону, в року 2024 на 15 евр за тону. Звышіня з 25 на 30 евр за тону в року 2023 і 35 евр за тону в року 2024 ся мать дотуляти уложіня ставебного одпаду на складку. Управа поплатків є у звязку з главным цільом реформы накладаня зо ставебным одпадом і одпадом з демолацій, котров ся мать звышыти потенціал обігового господарьства в області ставебного одпаду і сектора ставебницьтва, што мать вести к высшій мірі реціклації і передходити взнику ставебного одпаду. Наряджіня зачне быти діючім 1-го юла того року. (TASR, Pkf)