Міністерство внутрїшнїх дїл (МВД) СР уможнило у выбраных тіпів поліцайных дїялностей прияти і інтересуючіх з акцептовательнов порухов зраку. Зробило так про модерны знаня і способности з лїкарьской праксі. І тым кроком ся подарило до служобного померу прияти векше множство новых поліцайтів, котры актівно носять окулярї. Ку часточному увольнїню крітерій ся приступить і в припадї інтересуючіх, котры терплять алерґіями. TASR o тім інформовав говорця МВД Матєй Нойман. ,,Цїлём тых змін є забезпечіти, жебы поліція была годна ословити і здобыти кваліфікованых, мотівованых і одборнї способных членів, котры суть способны повногоднотно выконавати службу і наперек даякым здравотным обмеджіням,“ увів міністер внутрїшнїх дїл Матуш Шутай Ешток (Hlas-SD). Зосуладжіня нароків з поліцайнов праксов є частёв намагы стабілізовати Поліцайный збор, котрому все хыбує высше 3000 поліцайтів.

(TASR, Шутіова)