Темами 111. пленарного засіданя Конференції єпіскопів Словакії (KBS), котре ся вчера і днесь одбывать в Спішскій капітулі, суть демоґрафія, родина і молодеж, ці охрана дітей і превенція в области злоужываня в церькви. Пресова канцеларія KBS на свойій веб-сторінці інформовала, же єпіскопы собі тыж припоминають 30-те выроча другой апостольской навщівы святого Яна Павла ІІ. на Словакії. По засіданю ся єпіскопы пересунуть до Нітры, де ся в суботу 5-го юла на свято святых Кирила і Мефодія, апостолів Словянів, одбуде Кирило-мефодійска народна путь. Вчера єпіскопы оцінили пятьрічный період діялности пасторачных діл в марґіналізованых ромскых комунітах. Тот проєкт, підпорованый владов СР од року 2020, є подля KBS спрямованый на внутрішню конверзію адресатів через довгодобу духовну службу, особну і ґрупову формацію і підпору освіты в найзранітельнішых областях Словакії. Притомность пасторачных робітників в ромскых комунітах ся указала як ключова при будованю довіры, підпорі освіты, превенції кріміналиты і понижованю напятости. В роках 2022 аж 2024 ся проєкт розшырив на 12 центрів. (TASR, Pkf)