Запровадити бы ся міг новый карный чін пошкоджованя войновых памятників, войновых гробів і войновых културных памяток. Запропоновала то ґрупа коалічных депутатів у новелізації Карного закона, котру передложыла до Народной рады СР. Звернула при тім увагу на нароснутя припадів пошкоджованя ці ничіня войновых памятників. За запричініня векшой шкоды на войновім памятнику бы в приподі схваліня новелізації грозив арешт аж на два рокы. В припаді, же бы то переступник закона зробив із окремого мотіву, за крізовой сітуації, як публічный чіновник, важнішым способом або бы тым запричінив значну шкоду, грозив бы арешт на єден аж пять років. В припаді, же бы то зробив як член небезпечного зґрупованя, запричінив бы тым шкоду великого розсягу або бы то зробив на теріторії, яка є хранена, грозив бы му арешт на два аж шість років.

(Медвідь, TASR)