Председове трьох мімопарламентных партій Мірослав Беблавый з партії Spolu, Михал Трубан із партії Progresívne Slovensko і Алойз Глина з KDH на понедільковій стрічі згодли ся, же до десятьох днів людям представлять договор, котрый зробить фундамент про новый штіл комунікації. Мав бы так само управити односины партій до парламентных волеб. Подля Трубана тоты три партії в многім не суть згодны, бо стоять за своїма вартостями, но не хотять звады і суть приготовлены о різніцях бісідовати почливо, без атаків і з решпектом єдного ку другому. Глина про аґентуру TASR додав, же має смысел стрічати ся, жебы політіци довєдна глядали рішіня. Обсяг договору іщі мають рішыти внутрі партій. Беблавый реаґовав, же задачов є принести зміну, котру собі люди жадають. Progresívne Slovensko і Spolu вже оголосили, же до парламентных волеб ідуть довєдна в коаліції, KDH буде кандідовати окремо. Коаліція вже мала стрічу з лідром партії Za ľudí Андрейом Кіском. Тот ся в понедільок стрітив зо шефом SaS Ріхардом Суліком. Суліковці вже так само авізовали, же до волеб ідуть самы.

(Медвідь, TASR)