В септембрі, значіть пів рока по приході пандемії на Словакію, были склады Справы державных матеріалных резерв наповнены лем на 16 процент. Є то потверджіньом, же влада літо промарнила, нияк пандемійов не занимала ся і приправы на другу волну занедбала, повів у реакції на резултаты контролі Найвысшого контрольного уряду председа мімопарламентной партії Hlas-SD Петер Пеллеґріні. Бывшый премєр твердить, же його влада мала на приправу перед новым коронавірусом дакілько тыжднів, кедь ся вірус зачав скоро шырити по Европі, наперек тому было здравотницького матеріалу достаток. Найвысшый контрольный уряд але твердить, же державны інштітуції не были приготовлены ани на першу волну. Міністерству внутрішніх справ уряд рекомендовав, жебы сістема ряджіня інштітуцій в часі вынятковой сітуації перешла комплекснов аналізов.

(Медвідь, TASR)