Презідент СР Петер Пеллеґріні по саміті НАТО в голандскім Гааґу выголосив, же СР не была против тому, жебы на нім брав участь україньскый презідент Володимир Зеленськый. Тото высловліня пришло по тім, як мадярьскый премєр Віктор Орбан перед прилітом до Гааґу увів, же проти Зеленського участі на робочіх стрічах ся поставили лідры Мадярьска, Словакії, Турції і Сполученых штатів, інформує о тім окремый справодайця пресаґентуры TASR. Пеллеґріні по саміті підчеркнув, же Орбаново выголошіня го здивувало. Увів, же він особно, міністер загранічных діл, міністер обороны ани амбасадор СР при НАТО не тлумачили таку претензію. (TASR, Pkf)