x

Вмерла Олґа Ґлосікова, перша директорка русиньского музея

00

Як інформовала родина, в середу 24-го апріля 2024-го року у віці 71 років вмерла Олґа Ґлосікова, перша директорка Словацького народного музея – Музея русиньской културы в Пряшові. Народила ся ПгДр. Олґа Ґлосікова, др. н., 24-го марца 1953-го року. Была родачков із русиньского села Камюнка, Старолюбовняньского окресу. Высокошкольскы штудії абсолвовала на Філозофічній факулті Універзіты Павла Йозефа Шафарика в Пряшові, в шпеціалізації філозофія – історія. По штудіях зачінала як учітелька на ущілищу в місті Світ. Пак стала фаховым асістентом на Высокій школі технічній в Кошыцях із резідованьом в Пряшові, днесь Технічна універзіта в Кошыцях. У 1990-ім році кандідовала до словацькой части Сеймовні народів Федералного згромаджіня за Комуністічну партію Словакії, котра была теріторіалнов частьов Коміністічной партії Чехословакії. До парламенту наступила аж додаточно, у октобрі 1991-го року. В парламенті была до юна 1992-го року, коли одбыли ся далшы парламентны вольбы. По куртій політічній карьєрі далше была высокошкольскым педаґоґом на Технічній універзіті в Кошыцях з резідованьом в Пряшові. Ку 1-му януару 2007-го року офіціално выникнув Словацькый народный музей – Музей русиньской културы. На директора той інштітуції быв выписаный конкурз, котрый на кінцю фебруара 2007-го року выграла Олґа Ґлосікова, і стала так першов директорков русиньского музея. На тій посаді была до апріля 2019-го року. Вічная память! Жрідло фотоґрафії: FC/ЛЕМ.ФМ (ЛЕМ.ФМ, Пкф)