Недостаток воды і перебываюче сухо в селї Слатвина в окресї Спішска Нова Вес огрожує отворїня матерьской школы в септембрі. ,,Воды нїт, высохли нам обидва потїчкы в селї. У водоємі воду таксамо не маме, приток є барз слабый. Люде не суть асі звыкнуты барз шетрити, каждый є звыкнутый на даякый комфорт. Є то тяжке, але дашто реґулуєме, довожаме воду заты через Підтатраньску водареньску превадзкову сполочность до водоєму. Припадно сі ю дакотры люде привезуть в бандаскох. Не злїпшує ся то, не падало уж ани не памятам,“ повів про TASR староста села Владїслав  Врабел. Єднак подля ёго слов высыхають і підземны праменї, кедьже не падать а єднак і студнї, котры іщі дотеперь фунґовали. ,,Зима была слаба, снїгу не было, также ся не доповнили праменї. Не знам, як то будеме далей рїшати, але є то таке зле, же увидиме, ці вобец отвориме в септембрі школку. Кедь не буде вода, так ю не будеме мати з чого напаяти,“ сконштатовав староста з тым, же поступно прибывають і далшы села, котры мають проблем з недостатком воды.

(TASR, Шутіова)