В неділю 18-го новембра умер у віці 79 років отець Франтішек Данцак, ґрекокатолицькый священик, публіціста, писатель. Отець Данцак народив ся 8-го фебруара 1939-го року у селі Варганівці. В часах делеґалізації Ґрекокатолицькой церькви в Чехословакії став православным священиком. Пізніше дістав ся до контакту з блаженым священомучеником Васильом Гопком і быв єдным з першых, котры вєдно із вірниками вернули ся в 1968-ім році ку ґрекокатоликам. Франтішек Данцак быв вынятково плодным автором, публіцістом, робив і шефредактора ґрекокатолицькых періодік. Обявив про Русинів забытого будителя і писателя Емілія Кубека, написав много публікацій о русиньскых селах і путницькых місцях. Брав участь в културно-сполоченьскім жывоті Русинів, быв членом Сполку русиньскых писателів Словеньска і Реґіоналного клубу Русиньской оброды в Бардейови. Похоронны обряды одбудуть ся в пятніцю в Церькви свв. апостолів Петра і Павла в Бардейові. Похороненый буде в селі Андрійова.
(Медвідь)