Міністры загранічных діл членьскых країн Североатлантічной аліанції днесь стрічають ся в Бруселі на дводньовых їднанях заміряных на підпору Україны, яка боронить ся перед російсков інвазійов. На стрічі має брати участь і шеф україньской діпломації Андрій Сибіга, котрый буде інформовати о сучасній сітуації на фронті, пише аґентура DPA. Сибіга уж минувшый тыждень в писмі пожадав міністрів із НАТО, жебы на засіданю підпорили рішіня позвати Київ до Аліанції. Україньскый презідент Володимір Зеленьскый назначів, же є охотный закінчіти войну з Російов, покля НАТО дає охрану україньскій теріторії, котра є під контрольов Києва. Темов іднань має быти і недавна російска атака експеріменталнов гіперсонічнов стрілов Орешник ці російскы губрідны атакы і саботажи проти членів НАТО.

(Медвідь, TASR)