В суботу 19-го авґуста 2023-го року закінчив ся у Новім саді тройдньовый XVII. Світовый конґрес Русинів, котрый мав на проґрамі в тот день ІІ. і ІІІ. пленарне засіданя. Робочій день почав тым, же председове окремых конґресовых комісії поінформовали о своїх засіданях, котры проходили день перед тым, а так само о робочіх планах на далшый дворічный меджіконґресовый період. Делеґаты дістали і інформацію о пятніцьовім засіданю Світового форуму русиньской молодежи. Форум собі выбрав нову председкыню, котров стала Светлана Бойчук з Румунії. Авотматічно нова голова молодежного форуму стала і новов членков Світовой рады Русинів. На XVII. Світовім конґресі Русинів схвалили делеґаты і великый, святочный ерб, котрый ся буде хоснувати при репрезентації у вонкашніх односинах, наприклад при комунікації з европскыма інштітуаціями ітд. Пропозіцію великого ербу зробив Мілан Ян Піліп, делеґат конґресу за Словацьку републіку, котрый гералдіков, в тім чіслі русиньсков, занимать ся довгы рокы. ІІ. пленарне засіданя продовжовало голосованьом о новім складі Світовой рады Русинів і о новій голові Світового конґресу Русинів. На пропозіції делеґацій за окремы членьскы державы были до Світовой рады Русинів голосованьом делеґатів выбраты – Юрій Капац за Чеську републіку, Андрій Трохановскый за Польщу, Штефан Лявинець за Мадярьско, Мійо Шайтош за Хорватію, Ґеорґій Фірцак за Румунію, Михайло Фейса за Сербію, Мартін Караш за Словакію, Микола Бобинець за Україну, і дочасно Павел Роберт Маґочій за США і Канаду. Світова рада Русинів номіновала на председу Світового конґресу Русинів Штефана Лявинця, котрому пізніше і єдноголосно делеґаты продовжыли мандат на далшы два рокы. Секретарьом Світового конґресу Русинів зістав Володимір Противняк Підпредседа Світовой рады Русинів суть на далшый дворічный період Мартін Караш і Ґеорґій Фірцак. Прес-секретарьом зіставать Петро Медвідь. Світова рада Русинів схвалила, же XVIIІ. Світовый конґрес одбуде ся о два рокы в столиці Румунії – в Бухаресті. Делеґаты XVII. Світового конґресу Русинів в рамках ІІІ. пленарного засіданя прияли і офіціалну резолуцію, котру будеме публіковати окремо. Головы членьскых орґанізацій на кінцю конґресовых засідань підписали Меморандум о довгодобій співпраці .  (ЛЕМ.ФМ, ПКФ)