Простор на Старомістькім намістю в Празі вчера сімболічно покрыли тісячі крестів. Сімболізовали жертвы пандемії коронавірусу, котрых чісло в Чеській републіці приближыло ся ку 25 тісяч. За тов споминовов подійов стоїть рух Milion chvilek pro demokracii, інформовав о тім в понедільок портал Novinky.cz. Кресты накреслены крейдов на землі были частьов гепенінґу, котрым хотів то рух оддати честь жертвам епідемії. На 22-го марца припала річніця смерти першого чеського паціента з хворотов COVID-19. Быв ним 95-річный муж, котрый вмер в пражскім Шпыталю на Буловці. Кресты суть подля руху „сімболом влады промарненых жывотів“. В цілій Чеській републіці са вчера на полідне розозвучали дзвоны на храмах. Такым способом собі жертвы припомянув рух Minuta ticha.

(Медвідь, TASR)