Дочасным туніскым презідентом ся стане дотеперїшній председа парламенту Мугаммад Насір. Дакілько годин по смерти туніского презідента Баджіго Каіда Сабсіго то ознамив у четверь новинарём підпредседа парламенту Абдал Фаттаг Муру, інформовала о тім тлачова аґентура AFP. Насір мав подля нёго зложыти прісягу в парламенті о 17:00 г SELČ. Муру доповнив, же на основі уставы може Насір функцію дочасного презідента выконавати найвеце 90 днів. Туніскый презідент Сабсі умер у віцї 92 років по тім, як го в середу вечур перевезли до воєньского шпиталю в головнім місті Туніс. Подля справ туніскых медій го госпіталізовали на єдноткі інтензівной старостливости.

(Шутіова,TASR)