Членьскы штаты Европской унії (ЕÚ) уж неможуть доважати угля з Росії. О півночі зо середы на днешній день ся то значіть скінчив переходный період і зачало платити ембарґо на імпорт угля. Пресаґентура TASR о тім інформує на основі справы аґентуры DPA. Ембарґо было частьов пятого пакунка санкцій одобреного в апрілі і цалком вступило до платности од днешнього дня. Европска комісія в апрілі увела, же ембарґо на довоз угля може Росію стояти 8 міліярд евр рочні. Німецькый союз довозців угля VdKi і наперекір ембарґу нерахує з тым, же бы в Европі міг быти з угльом проблем, кедь же на світовім ринку є к діспозиції. Главныма додавателями суть Сполучены штаты, Южна Афріка, Австралія, Індонезія і Колумбія. Заказ довозу угля быв першов санкційов, котра ся доткла додавок енерґій. ЕÚ пізніше в снажіню звышіня тиску на Москву одобрила і заказ довозу російской ропы, котрый зачне платити на кінці рока. Выїмку мають країны высоко завіслы од додавок через роповоды, як Мадярьско і Словакія. (TASR, Pkf)