Чеськы комуністы при днешнім голосуваню о недовірі владі премєра Андрея Бабіша зохаблять салу. Інформувала о тім  справодайска телевізія ČT24, котрій то потвердив єден з членів KSČM. Фактічно то значіть, же тым непрямо підпорять Бабішову владу. Опозиція, котра голосуваня выкликала, так небуде мати достаточне чісло голосів на высловіня недовіры. Непозераючі на выслідок голосуваня буде далей керувати штат кабінет Андрея Бабіша, протоже презідент ЧР Мілош Земан в понеділок премєрові приобіцяв, же го зохабить керувати і без довіры аж до волеб до долной коморы чеського парламенту, котры ся одбудуть 8-го і 9-го октобра. (TASR, Pkf)