Тісячі людей в понедільок вечур протестовали проти выроку іспаньского найвысшого суду, котрый заказав каталаньскому премєрови Кімови Торрови быти в публічній функції. Протесты проходили в Барцелоні, але і в іншых каталаньскых містах. Торра бы подля суду не мав быти у публічній функції слідуючіх 18 місяців, і мав бы заплатити штроф 30 тісяч евр. Найвысшый суд лем потвердив вердікт реґіоналного суду, котрый одсудив Торру з непослуханя урядного наряджіня і гражданьской неслухняности іщі в децембрі 2019-го року. Премєр Каталанії не слухав наряджіня Централной волебной комісії, і не одстранив почас волеб, котры проходили минувшый рік, з публічных будов сімболы руху за незалежность.

(Медвідь, TASR)