В Пряшівскім краю проходять матуріты од вчерайшого дня до пятниці і то на 105 середніх школах. Реалізовати екстерну і тыж письмову форму інтерной части матурітной скушкы там буде веце як 5500 матурантів. Скоро 4200 з них є зо середніх школ, котры суть в компетенції Пряшівского самосправного края. Пресаґентуру  TASR о тім інформовала говорькыня края Даша Єленьова. „В рамках середніх школ в пряшівскім реґіоні ся до матуріты залучіло 1744 ґімназістів, з того 1074 школярів з ґімназій , котры суть в компетенції пряшівсков крайской самосправы. В припаді середніх одборных школ піде о 3660 матурантів, конкретно 3078 з них суть школярі зо жупных середніх школ. Матурують  і 99 школярів зо середніх шпортовых школ, де 46 є зо жупной Середньой шпортовой школы в Попраді,“ увела Єленьова. Вчера ся реалізовали матуріты зо словацького языка і літературы, днесь то быв анґліцькый, французькый, німецькый, руськый, іспаньскый і італійскый язык. Завтра собі матуранты овірять свої знаня з математікы. В пятницю є приправлена матурітна скушка зо словацького і україньского языка і літературы. (TASR, Pkf)