Міністер внутрїшнїх дїл Роберт Каліняк і презідент Поліцайного збору СР Тібор Ґашпар у четверь представили опатрїня, котры резорт планує завести в припадї тзв. отравлюючой кріміналіты. На планї мають три основны пункты в змінї закона. Бісїдує Каліняк: „В области самого закона о знижованю кріміналіты ромскых осад, хочеме ставляти на трёх основных пільєрах. Першым є передовшыткым пізвышіня компетенцій поліцайтів. Про мене є барз важне, жебы сьме могли путёв закроків поліцайтів лїпше вырїшыти дакотры преступкы, або трестны дії, то значіть тоты, котры ся довкола з великов інтензітов повторяють, і то є довод, чом попрі законї будуть приходити і інтеґрованы поліцайны оддїлїня. Ці вже є то в Кромпахох, або є то в Ревуцій і в Хміняньскій Новій Всі. А третїм пільєром суть самособов обчаньскы глядкы.“ Каліняк вецераз підкреслив, же у звязї з тым буде міністерство брати штатістічны данны тзв. ромской кріміналіты. „Все сьме нападны,кідь бісїдуєме о тім, же екзістує штось таке як термін ромска кріміналіта. В Кромпахох і в засяговім обводї Кромпахы обводного оддїлїня поліцайного збору ся находить коло 26,27 процент жытелїв, котрых можеме зарядити міджі жытелїв соціално вылученых комуніт, ромскых осад і ромской комуніты. Але в трестній чінности представлюють 70 аж 80 процент. Тот непомер є дасть ся повісти тройнасобный а то є вец, котра ся мусить змінити,“ повів Каліняк. Міністерство приправлює у звязї з тым і інтеґрачны опатрїня, напр. вытворїня сїтї підпорных працовиск, котры докажуть рїшыти соціалну сітуацію і выхову дїтей, то значіть комунітны центра. (TASR)

Фото: TASR