x

Презідентка принимать лідрів партій Sme rodina, SaS і Za ľudí

00

Презідентка Зузана Чапутова днесь принимать в презідентьскім палаці лідрів Za ľudí Андрея Кіску, Sme rodina Бориса Коллара і SaS Ріхарда Суліка. Цільом є бісідовати з нима о їх інтересі вступити до коаліції. Покля ся потвердить воля вытворити владу, презідентка повірить їй зоставліньом лідра руху OĽaNO Іґора Матовіча, котрый выграв суботняйшы парламентны вольбы. Презідентка о тім інформовала по стрічі з Матовічом, котра проходила вчера. Лідер OĽaNO потвердив, же ся стрічать з потенціалныма партнерами, днесь го чекать стріча с Кіском. Уж вчера ся зышов зо Суліком і Колларом. Презіденткын поступ Матовіч оцінив. Повів, же при зоставльованю влады не хоче нич ускорити, але хоче, жебы то было чімскоріше. Презідентка по понедільковій стрічі з Матовічом повіла, же є то велика довіра, котра ся дістала тому руху і далшым партіям, а так само велика одповідность. Додала, же з їх сполочного розговору выходить, же Матовіч собі тоту одповідность усвідомлює.

(Медвідь, TASR)