В середу 25-го януара 2023-го року повірена словацька влада на своїм засіданю схвалила нове Наряджіня влады Словацькой републікы, котрым выдає ся список сел і міст, в котрых гражданы Словацькой републікы, якы належать ку народностній меншыні, творять найменше 15 процент населіня. В даных селах і містах мають меншыны право хосновати меншыновый язык в уряднім контакті. Чісло такых сел і міст ся по новому підняло. Кедь дотеперь было на Словакії 638 сел і міст, де мож было хосновати меншыновый язык, теперь їх буде о 125 веце. Веце будуть мати і Русины, котры мали дотеперь 66 сел означеных по русиньскы і од 1-го марца здобудуть далшых 88 сел. Цілково будуть мати 154 сел і міст, де будуть двоязычны означіня, і русиньскый язык в них буде урядный. До того іщі будуть далшы означіня містных частей, як наприклад в Меджілабірцях, але і в селах, котры были злучены. (ЛЕМ.ФМ, Pkf)