Волич може в споєных  реґіоналных вольбах голосувати лем в селі свого тырвалого перебываня.  Голосує у волебнім одділіню, в котрого списку волич є записаный. Воличі мають можность у своїм селі пожадати о переносну волебну урну, покы мають на то важны, главні здравотны причіны.  Волич ся мусить леґітімувати обчаньсков леґітімаційов, в сітуації чуджінця є повинне предложыти доклад о перебываню чуджінця. Резорт внутра тыж інформував, же список воличів про єднотливы волебны одділіня выготовлює село на основі незмінного списку воличів. Вольбы до орґанів самосправы сел і вольбы до орґанів самосправных країв ся одбудуть 29-го октобра. Хоч піде о споєны вольбы, волич їх буде діференцовати фаребно. Комуналны вольбы будуть мати білу фарбу, вольбы до высшых теріторіялных цілків (VÚC) модру фарбу. (TASR, Pkf)