Як інформовав Театер Александра Духновіча (ТАД), в пятніцю 27-го юна 2025-го року добило сердце Ярослава Сисака. Бывшый актор, директор театру, режісер і перекладатель пєс на русиньскый язык, але і возродный діятель вмер у віці 86 років. Ярослав Сисак зачав свою театралну карьєру в 1957-ім році. Після штудій у Києві вернув ся до Пряшова і як режісер. Під його веджінём, Україньскый націоналный театр (УНТ) зачав грати пєсы по русиньскы, што стало початком русиньского театру. По 1989-ім році Сисак актівно підтримав русиньске возроджіня. Під його веджінём УНТ змінив назву на ТАД і перешов лем на русиньскый язык. ТАД став центром, котрый помагав Русинам в їхнім еманціпачнім процесі. Сисак быв єдным із основаючіх членів Русиньской оброды на Словеньску і єден час (1995-1996) быв і єй председом. Він прочітав і Декларацію при кодіфікації русиньского языка в 1995-ім році. І по закінчіню директорской функції, Ярослав Сисак актівно перекладав пєсы на русиньскый язык, што свідчіть о його неперервній роботі. Смертьов Ярослава Сисака страчаме вызначну особность русиньского театру і нашого возродного руху. Вічная память! Джерело фотоґрафії: ЛЕМ.ФМ/Facebook (LEM.FM, Pkf)