x

В Пряшові інтронізовали апостольского адміністратора

00

В неділю 8-го мая быв у Катедралнім соборі святого Йоана Крестителя в Пряшові інтронізованый до уряду апостольского адміністратора sede vacante Пряшівской архієпархії владыка Петро Руснак, братіславскый єпарха. Як інформовав говорця Пряшівской ґрекокатолицькой архієпархії Михал Павлишіновіч, на початку торжественной події Монс. Андрій Євчук, шарже д-аффер (chargé d’affaires) Апостольской нунціатуры на Словакії прочітав декрет Конґреґації про восточны церькви в Римі. Зречіня ся уряду пряшівского архієпіскопа і метрополіты Йоана Бабяка Папа римскый Франціск прияв 25-го апріля. Владыка Петро Руснак зіставать єпархіалным єпіскопом Братіславской єпархії, і вєдно з тым буде рядити Пряшівску архієпархію як апостольскый адміністратор. Головным служытельом торжественной літурґії быв новый апостольскый адміністратор, котрый і проповідав. Вєдно з ним служыли владыка Йоан Бабяк, владыка Маріян Андрій Пацак, Монс. Андрій Євчук, за Кошыцьку єпархію быв участный архімандріта Ярослав Лайчіак і приблизно тридцять священиків Пряшівской архієпархії.

(Медвідь)