x

Матисова хоче реалізувати проєкт ревіталізації сельской архітектуры

00

Село Матисова є невеликым  русиньскым валалом, котре лежыть в Старолюбовнянскім окресі і є знама нелем свойов тіпічнов архітектуров, але і чудеснов природов, котра робить зо села ідеалным місцем на релакс і одреаґуваня ся од каждоденных стресів. Правдаже, то суть выгодами котрыма Матисовчане діспонують од віку-віків. Але вшытко мать і свої негатіва. Тоты ся в днешній Матисовій одразили на низькім чіслі єй обывательства, днесь в ній жыє 69 обывателів. З тым є повязаный і низькый бютжет села. А деє недостаток фінанцій, там ся і тяжко дашто робить про село, там ся і тяжко старостує.  Пітвердив то і сам староста села Павло Пастірчак.  Наперек тому, староста ся снажыть  реалізовати і проєкты. Єден з такых ся буде реалізувати початком будучого рока, „є то проєкт ревіталізації сельской архітектуры в нашім селі. Матисова є знама тым, же маме коло потока, около путі  деревяныма жолобками, до котрых тече вода. В містній бісіді ся їм говорить – гучок. Зато так, бо в них вода гучіть. А  кедже наше село є ними знаме, так бы сьме хотіли нашы гучкы обновити, дати їм таку патіну  того віку, од коли ся они хоснують. Гучкы ся даколи хоснували про худобу на питя, днесь собі турісты там холодять свої напиткы, ці прямо пють з них. “ (TASR, Pkf)