Як інформовав председа Русиньской оброды на Словеньску (РОС) Мартін Караш, орґанізація і їй партнеры припомянуть собі День Русинів Словакії веце подіями в різных містах, де жыють Русины. Головный проґрам тот рік одбуде ся в центрі історічного міста Бардейов, де в співпраці з містом Бардейов Русиньска оброда приготовила цілонародны святкованя. Подія на Раднічнім намістю одбуде ся якраз в день, на котрый припадать День Русинів Словакії – 12-го юна 2022-го року. Русиньске свято в Бардейові зачне кройованов процесійов, котра піде од Містьской шпортовой салы до центра міста, де пак зачне културный проґрам. В рамках културного проґраму выступлять русиньскы колектівы і солісты з реґіонів Снина, Меджілабірці, Свідник, Бардейов ці Стара Любовня. Подія буде завершена выступліньом єдиного русиньского професіоналного ансамблю – Піддукляньского умелецького людового субору.  День перед тым, в суботу 11-го юна, одбудуть ся події з нагоды Дня Русинів Словакії в Снині і Меджілабірцях. Ку святкованю Дня Русинів Словакії приєднало ся і тот рік Народностно-етнічне высыланя Радія і телевізії Словакії в Кошыцях. Радіо уж вчера на 8-го юна приправило у своїх просторах публічный концерт з назвов Марія Чокинова – голос, на котрый ся не забывать. Уж традічно вєдно із святкованями Дня Русинів Словакії одбуде ся і Духновічів Пряшів і то в понедільок 13-го юна в просторах Театру Александра Духновіча.  (TASR, Пкф)