Мадярьскый премєр Віктор Орбан ся остро высловив к участи україньского презідента Володимира Зеленського на саміті НАТО в голандскім Гааґу. Подля Орбана ся проти Зеленського участи на робочіх стрічах поставили лідры Мадярьска, Словакії, Турції і Споєных Штатів. Орбан тото повів під час літу до Гааґу про мадярьскы медія, інформує о тім справодайця TASR в Будапешті. „В діпломації не іде о то, де дахто є, але де не є. Американци, Турци, Словаци і мы сьме ясно дали наяво, же в справах НАТО не хочеме сідіти з паном Зеленськым за єдным столом,“ повів Орбан. Мадярьскый премєр дале выголосив, же є в націоналнім інтересі Мадярьска не быти в ниякім здружіню з Українов – ані в НАТО, ані в Европскій Унії. (TASR, Pkf)