Будучность малых держав є у співпраці з далшыма країнами, котры вызнавають демокрацію і слободу. В понедільок то повів председа словацькой влады Едуард Геґер почас стрічі з презідентом Латвії Еґілсом Левітсом. Навщіва латвійской головы державы на Словакії одбыла ся по 16-ох роках. Дослідкы російской інвазії на Україну чують найвеце країны на выходній граніці НАТО. Словакію і Латвію спаять тота граніця, зато сьме одказаны на поміч Аліанції, повів премєр з тым, же про тоты дві країны є важна єдность в Североатлантінчій аліанції і Европскій унії. Лідры діскутовали і о підпорі Україны, боротьбі проти дезінформацій, но дотулили ся і темы сполочного накупліня ґазу, на чім ся доїднали представителі Европской унії на остатнім саміті в Бруселі. Подля Геґера є знижованя енерґетічной залежности од Росії і діверзіфікація джерел сполочным інтересом обидвох країн.

(Медвідь, TASR)