Турецькый презідент Речеп Тайїп Ердоґан в понедільок заґратуловав Владимірови Путінови ку зновузволіню до функції російского презідента і запропоновав му, же буде посередником меджі Москвов і Українов. З одкликаньом ся на канцеларію турецького презідента о тім інформує аґентура AFP. Припомянула, же то не першый раз, што Ердоґан понукнув свої службы як посередник у войні на Україні. Сам притім намагать ся утримовати приятельскы односины з Путіном і україньскым презідентом Володиміром Зеленьскым. Ердоґан привітав Зеленьского в Істанбулі початком марца. У фебруарі мав до Турції прийти і Путін, но свою навщіву одкликав.

(Медвідь, TASR)