В днях 29-го юнія аж 2-го юліа проходив в хорватьскім місті Осієк XIV. Світовый конґрес Русинів і VIII. Світовый форум русиньской молодежі. Орґанізатором было Дружство Руснак, членьска оґанізація конґресу за Хорватію. Пленарны засіданя конґресу і форуму проходили в пятніцю і суботу. Окрім інформованю о діялности членьскых орґанізацій конґресу і Світовой рады Русинів як выконного орґану конґресу за дворічный міджіконґресовый період, делеґаты занимали ся приятьом нового штатуту а выберали собі і нову Світову раду і председу рады. Нова рада є в складі Штефан Лявинець за Мадярьско, Микола Бобинець за Україну, Мартін Караш за Словакію, Андрій Копча за Польщу, Дюра Папуґа за Сербію, Джон Ріґеттій за Северну Америку, Феорґій Фірцак за Румунію, Ян Чопик за Чеську републіку, Мійо Шайтош за Хорватію і Светлана Мурешан, котра є членков рады за Світовый форум русиньской молодежі як председкыня форуму. Подля нового штатуту першыраз выберав ся председа Світовой рады, котрый є єдночасно уж і председом Світового конґресу, прямо делеґатами конґресу. На функцію кандідовав Штефан Лявинець, котрый быв председом і в попереднім періоді, Микола Бобинець і Джон Ріґеттій. В другім колі тайной прямой вольбы делеґатів конґресу выграв Штефан Лявинець. Конґрес знова апеловав на вызнаня Русинів на Україні і выбрав собі 23-ій марец як Світовый день Русинів, котрый ся буде святковати окремо од днів Русинів, якы суть схвалены в окремых членьскых державах. Слідуючій, XV. конґрес, одбуде ся на Словакії в році 2019.